老豆︰
你離開我已經有一個多月o既時間了, 我腦海中經常都會浮現你生前o既晝面。可能係因為人類常講o既︰"事情係需要時間沖淡" 。當然, 時間一日一日咁過去, 我o既感覺亦冇當時咁沈重同悲痛。
七月頭番屋企見到你成塊面黃哂, 嗰刻真係好心痛, 好想忍住唔比你見到我喊, 可惜都係比你發現到。
我決定拎假番黎陪你、同你飲茶、行超市....嗰幾日我真係好唔開心, 因為我知道你可能就快要離開我, 不過我感覺到你好開心, 因為我地兩父女好耐冇一齊飲茶行街街喇~~ 縱使你已經係好冇情神同力氣~
七月七號我決定送你入醫院, 當晚收到醫生o既電話, 叫我地要有心理準備, sorry, 我冇同你講番, 仲呃你幾日後o既電腦掃瞄可能要等你身體好D先做, 我知你明白的!
七月十二日黎探你, 你已經神智不清, 見你張大雙眼, 但又唔講唔到野, 目光冇焦點....我真係好好好好心痛.....眼淚不停咁流,到依家打緊BLOG都不停流。心知道 : 時間冇多了...決定希望你能安安樂樂咁離開。
七月十三一早上我走去婚姻註冊處, 希望佢比我將日子改早, 好彩佢地通融, 我亦搵到律師幫忙。老豆︰囡囡要結婚了﹗我响你見証下註冊了﹗結婚証書上係你愛人呀E幫我們簽的, 即是代表你﹐你知道嘛？囡囡成家喇, 我知道病床上o既你係知道嫁﹗
七月十四日早上九點電話响﹐我怕到唔敢聽, 叫老公起身聽。果然, 老公叫" 換衫啦, 打比呀E!" 我知道,
我要面對的事到了.....老豆︰你仲記得臨走o既時我地都到齊嘛？囡囡我, 女婿、你最愛o既呀E, 同你最啱傾的呀E囝囝,
你最親o既人都陪住你行埋人生最後一段路喇~
呢廿幾年同你o既一點一滴, 我都冇忘記到﹗你係一個好爸爸, 身兼母職﹐一個男人將我由bb仔養到咁大, 你絕對係一個好爸爸﹗請你去到天國都唔好忘記我﹗ 唔好忘記最鍚你o既女兒。
老豆︰我唸嗰到o既生活應該好好, 你唔會再有病, 唔使再食藥. 你可以放心好好生活, 我已經嫁咗個好老公, 放心吧﹗不用擔心我喇﹗如果有來生, 我希望都可以做你女兒﹗
乖女兒
沒有留言:
張貼留言