青咖喱雞翼

咖喱真係令人食唔停口,因為我唔食得辣, 所以出面既咖喱通常都唔啱我口味, 一係太辣、一係唔香。

我好鐘意自己煮咖喱, 特別係青咖喱。我煮既青咖喱係偏甜的, 因為唔食得辣嘛~~ 我會落好多椰奶同椰糖, 所以如果其他人食我煮既咖喱, 我唸多數都會唔啱食, 可能仲會話:"都唔似咖喱既"。

但我同鬼佬好似口味一樣, 大家都好like, 食咗兩大碗飯呀!

响東南亞鋪買包青咖喱醬5蚊雞, 再加盒椰奶 (今次買咗椰漿, 要自己加水啊) , 咁就可以煮青咖喱喇。

今次因為懶同慳番D既關係, 所以冇買任何泰式香料,想香D緊係買哂嗰D香葉呀、香芧呀、南薑呀......

材料: 雞翼 (先用魚露, 生抽, 糖 醃半天), 泰式茄子, 薑, 蒜, 蔥頭, 青咖喱醬, 椰奶, 椰糖

1. 雞翼同茄子先煎至八成熟, 撈起備用
2. 熱鑊炒香薑, 蒜, 蔥頭, 落2湯匙青咖喱醬炒香, 倒入椰奶一細罐, 加入少量椰糖調味
3. 調至啱口味時將雞翼茄子再加入青咖喱汁再煮一陣便成

(建議每樣都慢慢咁落, 唔夠辣才加青咖喱醬, 唔夠甜味先加椰糖, 想多D汁先加椰奶)
 
(私人袐方: 可於最後加入少少蝦醬, 少少好喇, 可以釣出青咖喱既香味出黎)