牛油果三文魚他他

 成日都好想整呢個三文魚他他,因為出面D西餐廰整到好鬼靚, 但我一知道入面D料又唔想叫黎食喎 (唔抵食嘛!師奶心態~)

上綱搵完食譜後, 再加D減D,雖然呢個唔係正宗既他他 (實情咩為之正宗我都唔知), 不個都叫似模似樣啦~

味道唔錯嫁, 因為我用咗一種不死醬 - BB麻醬 !! BB麻醬係無敵的, 用响咩到都一樣好味!

 

鬼佬出街食飯我留咗一個比佢, 點知整完後雪咗响雪櫃幾個鐘開始出水喇~ 所以勸大家整完要即食, 免得有細菌滋生。

點樣可以整到佢地一個圓型咁? 我唔會專登買個圓型模番黎既, 我用藥水樽洗乾淨, 再响屋企個工具箱搵比鋸仔.....鋸鋸鋸.....冇工具的話, 用氣水樽, 再用較剪開亦得。

材料
三文魚刺身6片
牛油果半個
洋蔥1/4個
青瓜1/3條
蟹籽

汁料
日本豉油1茶匙
檸檬汁幾滴
麻醬1茶匙

將所有材料切粒(大小隨意), 然後撈入汁料 , 用模整出圓柱型, 上面放上蟹籽及日本芥苿