蝦醬蒸豬肉豆卜底

自從2012年去過一次大澳, 响入面買咗樽蝦醬後, 就深深愛上佢。用哂嗰樽後, 一路都係响其他地方買蝦醬, 但冇一隻好味, 全部都得個咸, 一D都唔香。

早兩個月有同事話去大澳, 幫我買咗樽蝦醬, 亦都係得個咸字。嗰隻醬係有牌子的, 樽身有標籤的。又再一次失望!

上星期去行山, 正正今次路線係石壁往大澳....大澳? yeah~~~ 今次我親自買, 搵咗一間細細地既鋪頭, 揀咗一隻佢地話係自家整的, 樽身完全冇標籤。果然今次冇令我失望~~~

一蒸完已經聞到嗰陣香味~ 可惜我冇映低間鋪, 唔係都想介紹大家, 唯有等下次再行山時映過啦~

蝦醬蒸豬肉再加豆卜底, 配上菜飯!  有乜可能唔食多兩碗呀~~ 想瘦真係好難喇!!


材料: 25蚊豬肉, 8粒豆卜一開四, 

1. 豬肉先用 蝦醬2湯匙, 糖1湯匙, 生抽1茶匙, 蒜蓉1湯匙醃半小時以上
2. 再用生粉, 生油, 水, 麻油 醃多陣
3. 豆卜鋪低, 水滾後大火蒸8分鐘