焗豬扒飯

豬扒係一樣我整極都唔好食既食物, 就係因為咁, 我屢敗屢戰。爬過好多文, 大部份都話要拍鬆塊豬扒, 又話要拍到塊扒變成一倍大。 

我可以講, 無論係: 係咁e拍、拍多幾吓、拍到一倍大.....乜方法既拍法我都試過, 就係做唔到入口鬆軟既效果.....

但係今次, 我開始滿意少少我既豬扒喇~ 我用咗惠康既冰鮮豬扒, 將佢每邊每面拍咗2-3次, 然後用黑啤醃佢, 出黎既效果我都算滿意~ 

剛煎完既豬扒用筷子篤佢我feel到好鬆軟, 不過當入完焗爐15分鐘後, 豬扒又再變得熟咗, 雖然唔係"un", 但我相信可以再控制得好D! 

鬼佬永遠係我煮食既忠實FANS, 我一路嫌棄緊D豬扒佢就一路食一路講: :"唔係喎, 好食呀! 唔"un"呀....好食過出面喎..."  仲食哂成盤!  抵錫!!

材料: 
豬扒5塊 、 雞蛋1隻、 蕃茄1個、 金寶牌香甜蕃茄一罐(懶人汁)、黑啤一杯、洋蔥

1. 先煮好炒飯底, 放焗盤上備用
2. 豬扒拍鬆後, 先用黑啤, 鹽, 糖, 生抽先醃 (最好醃一晚)
3. 煎豬扒至半熟, 撈起鋪上炒飯面
    (豬扒不能煎太熟, 因為跟住要入焗爐, 唔係會變得太老就"un"嫁喇)
4. 炒香洋蔥, 蕃茄, 加入少少糖, 倒入香甜蕃茄+1罐水, 慢慢調味至啱口味
5. 再將4鋪上豬扒飯面, 面上攦上芝士碎, 焗爐180度15分鐘