南乳炆鴨

啱啱星期五見肥媽個節目整炆鴨,又心痕痕想跟吓風, 不過屋企冇靚腐乳, 又冇豆板醬, 又改用南乳黎炆。 

南乳真係冇得輸,真係點整都咁好味。 愛重口味既人一定啱食。

惠康買既急凍米鴨$32.9/隻, 都幾大隻嫁~ 呢隻鴨我同鬼佬要食兩餐先攪得掂! 抵!

材料: 米鴨一隻  / 薑 /  蒜 / 八角一粒 

調味: 南乳一大舊 / 蠔油1湯匙 / 老抽3湯匙 / 油2湯匙 / 冰糖一舊 (全部撈勻)

做法:

1. 米鴨解冰後抺乾淨, 切件

2. 白鑊煎鴨, 皮向下 (跟住會煎出好多油出黎, 要先煎出油鴨先唔會有so味)

3. 將煎出既油倒去

4. 鴨維持原鑊, 落薑蒜炒, 然後落調味料炒勻

5. 加水蓋過鴨, 大火5分鐘後, 轉中小火炆25分鐘, 熄火10分鐘後再開火炆至汁收 

(記得最後要試味呀)