蟹籽燒賣

最近真係屎忽痕, 係咁整點心. 又玩糯米雞, 又玩燒賣, 遲吓可能攪番檔吸血鬼點心 , 頂死D酒樓先得~~~ (喂, 發完夢未? .到時等執都似!)

其實整燒賣既材料真係好簡單, 只需碎肉$15, 冬菇幾隻, 海蝦蝦10隻


講開買蝦, 雖然去街市買野點都好過D超市. 不過有樣野真係最唔好, 就係好似D海鮮檔咁, 明明寫住$45一斤, 但當我想去買半斤時
佢就會話: "30蚊啦"      就算我同佢講:" 太多喇, 食唔哂!"    佢就直情唔賣比你~
買菜又係, 半斤菜其實對兩個人黎講都真係好多嫁, 可惜, 菜檔絕對唔會賣少過半斤比你~
其實真係好嬲~ 咁即係焗我買咁多啫, 即係一,兩個人唔使買餸嫁啦~


好~ 講完算, 又講番我D燒賣

燒賣皮$5 (當然我用咗一半都冇啦, 都係嗰句, 你想買$2 ? 係咪想比老細用掃把掃你出去!)

其實做法同整水餃差不多.

1. 冬菇浸軟切粒, 蝦切粒
2. 碎肉先用鹽, 糖, 生抽, 大地魚粉, 胡椒粉, 麻油, 生粉, 蛋白 醃好
3. 然後加入冬菇粒, 膠粒及冬菇水攪至起膠
4. 包入燒賣皮後, 上面加上原隻蝦, 再於上面鋪上蝦籽, 食時大火蒸8分鐘

我大約整咗24粒, 成本係$50.

$50出酒樓食大約食到兩籠, 仲要冇新鮮蝦比你~

鬼佬食完話: " 好好食喎, 但點解唔同出面d燒賣既?"

我問鬼佬: "你係咪食得太多樓下10蚊5粒嗰D面粉燒賣唔記得咗呢d先係真正燒賣呀?"