2013年芭堤雅 - 機票篇(Air Asia)

5月份响AIR ASIA訂咗平機票, 六日五夜既芭堤雅之旅終於都完結喇, 首先呢篇我要講解吓我訂既機票詳細價錢同坐AIR ASIA要注意既事項.

去程1/9 早上10:45
回程6/9 下午 16:30

機票 x 2                        $1292
機場稅                          $656
離境稅                          $104
燃油附加稅                  $320
去稅行李 15kg            $95
回稅行李 20kg x 2      $220
選擇坐位$20一個       $80
___________________________________
總數                            $2767


唔算太平, 不過都總算合理~  當然一分錢就一分貨, 佢既機係唔包飛機餐, 而且機身比一般大公司既機係細好多, 所以坐既時候都唔太舒服, 腳長既人就辛苦D喇~ 坐位亦冇得靠後嫁~ 前面坐位背亦唔會好似其他航空咁有電視睇~ 水都唔會有, 想飲水就要買喇~

記住AIR ASIA飛既係泰國舊機場, 即係廊曼機場DMK. 正所謂cheap cheap航空就飛cheap cheap機場~~

呢個機場同啟德既大細差不多, 一眼望哂~

但細既飛機同細既機場有個好處, 由於機細, 一班機可能只係得一百人左右, 所以落機既時候快咗好多; 而呢個機場, 我冇睇錯的話, 只有三間航空公司, 所以check-out時都唔需要排隊, 好快就可以離開機場喇~

走既時候大家記住入咗閘先好食野, 我地就係唔知, 以為入咗閘冇乜野食, 就响入閘前求其冇選擇下揀咗間冇wi-fi既 cafe食野. 點知原來入閘後乜都有得食, 最緊要係嗰邊d食店有wi-fi嘛!  (cheap cheap機場本身係冇wi-fi提供嫁)

回程時有接駁巴士接你出機場中間上機. 好少可以咁樣登機嫁, 未試過既你地記得要映多幾張相喇~


注意事項:

- 好多人話air asia成日會delay, 的確係咁. 好似今次去程時就delay咗半個小時左右. 明明10:15登機, 不過到10:30仲未見到架飛機, 結果10:35先見到有架air asia機降落, 就係我班機喇~   所以大家plan行程時要頂d時間比佢delay呀!

- 機身雖然細d, 不過只要天氣好, 一樣係好穩陣, 而且我覺得佢降落得幾好. 去程二個幾鐘就到達喇.  不過可能回程時係夜晚關係, 而且天氣有d唔好, 所以全程三個鐘都好搖.

- Air Asia 响香港國際機場既CHECK-IN 位置係响二號客運大樓, 即係坐巴士時, 唔好跟大隊落車呀! 同多數航空公司係唔同嫁!

寄倉行李:

Air Asia 只包每人可帶7KG hang carry上機, 如果要寄倉就要另外比錢買. 大家記住如果屋企有磅就磅吓先, 因為佢地真係會磅嫁, 超重到時要補錢, 又貴D又麻煩~
以我為例, 我帶咗一個高33" x 闊22" 既大喼, 入面只係放咗兩人幾日既夏天衫, 已經14.8kg喇~ 所以大家要小心呀!