芝士雞肉漢堡 (減肥變增肥)

事源上排鬼佬晚晚都唔同我食飯, 一係番通宵、唔使番夜時又有波局, 又有飯局 (真係多姿多采囉~~)

咁好啦,冇人陪我食, 咪自己食得清淡D當減肥囉。結果學人食雞扒沙律, 就係嗰D就咁拎塊雞扒去焗再加D生菜既食法 (當然我要加番少少醬啦, 唔係點食呀?@@食草咩~) 

 就係呢碟野喇, 其實好味嫁, 香草雞扒+鯖魚, 仲有一湯匙既BB沙律醬伴蕃茄生菜, 老實講一D都唔難食。但.....當你連續三、四晚都係食同一種食物, 我唸你都會頂唔順。

 結果第五晚我將雞扒啄成肉餅, 再加芝士整個漢堡。 嘩....芝士流出啊, 超美味!!!

所以話呢....減肥餐呢家野真係唔啱我囉! 

人生苦短呀, 我要食食食呀!!!!

材料: 去皮雞扒2塊, 麵面糠, 雞蛋1隻, 麵粉, 芝士1塊

1. 先將雞扒啄成肉碎, 加入鹽,糖, 香草調味

2. 再拌入面包糠, 雞蛋, 面粉同一方法攪至起膠

3. 分成四等分, 每份包入1/4塊芝士, 搓成餅型煎至熟