蝦醬蒸豬肉

又係用大澳野既晚餐, 蝦醬真係一次都未用過, 其實有時打開個雪櫃, 望吓D調味料, 真係有多樽都係用咗一次就忘記咗佢喇~ 所以有時同自己講唔好買太多調味番黎, 但當上綱見到人地整嗰樣餸時, 又不得不買嗰枝醬番黎喎~ 唉...師奶真係~~

買 開嗰檔既豬肉佬我好鐘意佢 (唔好誤會呀! 我嫁咗人好專一嫁喇!) , 因為佢好禮貌, 又唔會好似某D檔咁, 次次話要20蚊就切22蚊比你, 好似我以前住嗰到樓下檔咁, 都幫襯咗咁耐, 次次都切多幾蚊, 唔係同你計嗰1,2蚊, 間中就話你切多咗啫, 每次都係咁我就覺得你係明呃我囉~

依間檔嗰幾個豬肉哥哥, 人又後生, 又好笑容, 不論呀婆奶師佢都同佢地講笑. 仲有就係我買得少佢唔炸我型, 買親豬展我冇出聲佢都比條根我, 好似今日呢舊豬肉, 我話用黎蒸, 果然真係好滑, 肥瘦均勻. 我好滿意!

今次我蒸呢個豬肉調味調得好好, 豆卜吸哂D味, 不過就係唔夠汁, 所以撈唔到飯囉~

15蚊豬肉加幾粒豆卜一餐兩個人食唔哂, 留番第二朝自己煮面做餸~唔好浪費!



材料: 15蚊豬肉, 5粒豆卜一開四,

1. 豬肉先用 蝦醬2湯匙, 糖1湯匙, 生抽1茶匙, 蒜蓉1湯匙醃半小時以上
2. 再用生粉, 生油, 水, 麻油 醃多陣
3. 豆卜鋪低, 水滾後大火蒸8分鐘