杯迷 - 自整杯架

警告︰以下內容可能令人有作嘔、曬命、唔順超的感覺, 頂唔順者勿看

識我既人都知我好愛我家鬼佬(有點肉麻但唔好意思都要繼續講) , 直情有點迷戀嗰種。或者可能呢D就係, 你愛一個人, 佢放個屁都係香D既~ 

响我心目中鬼佬係好叻嫁, 家中一切大小事務都包辦 (洗衫煮飯當然唔計)。只要佢肯攪, 只要佢唔懶, 乜都可以攪得掂~

粗重野如換燈泡、鑽牆、裝傢俬.....文靜既如幫我update I-Phone(我到依家都唔識iphone究竟係點操作)、download野........全部冇問題 

 我地好中意儲酒杯, 儲儲埋埋好想將佢地放哂出黎, 但睇極d杯架都唔啱自己心水, 而且又貴。結果鬼佬唸到不如自己整個~

 

 

先搵幾塊Acylic膠版, 呢D版一d都唔平, 好似呢種8mm厚就要賣成二舊水咁滯。

鬼佬好有計, 識人拎到番黎, 免費~

 再响淘寶訂呢種層版夾, $20人仔一個, 我地三塊版共訂6個

 由於仲有紅酒杯, 所以响宜家買咗呢種紅酒架再加裝落去, 百零蚊有6個咁多

 就係咁, 琴日鬼佬成個下晏响屋企度位, 鑽牆, 三兩吓就攪掂哂喇~~~

我有位朋友曾經同我投訴過佢家男人連換燈泡、光管都唔識; 又曾經有位朋友同我講話佢老公電腦電話乜智能野都唔識, 要佢幫佢攪掂哂。

我好幸運有個萬能老公~ 乜都幫我攪掂哂~~