吸血鬼同所有香港人一樣都好鐘意去旅行, 不過因為呢幾日收入少咗, 唔再好似以前咁搵得多年年去玩, 加上又唔捨得我家主子BOBBY, 所以唔會年年去旅行。
對上一次去係泰國, 都三年了, 所以今次去日本真係好好好好.......期待! 由上年九月買完機票後一直興奮到出發。 到依家番咗黎成個星期個靈魂仍然番唔到黎~~
今次住宿方面係經AIRBNB訂, 第一次用佢去訂, 估唔到有驚喜! 由於我地係自駕遊, 所以民宿地點對我地黎講唔係問題。
呢間民宿好抵住, 大約係港紙二百零蚊一晚, 三個人夾番抵到爛。 全間屋我地三個人住哂, 唔會有人同你share。
不過我地由民宿渣車去心齋橋都需要半小時, 所以未必個個適合。
呢間就係民宿主人既屋企! 嘩....佢屋企好大呀!!! 我地就住响隔離既小屋 (對佢地黎講係小屋, 對香港人黎講.....明嫁啦!)
民宿周邊好日式味道, 全部都係兩層高既平房 (唉....人地邊有土地問題oY)
入屋後要除鞋嫁....
呢個係客廰 , 有餐椅, 有梳化, 有暖氣...成個感覺好舒服, 非常乾淨, 地下一粒塵都冇, 我地日日都係坐响地下, 感覺好sweet home呀!!!
民宿主人好細心, 有茶包、咖啡、乾糧準備好哂。 煲水、煮面、簡單既廚具都有齊。
入房喇....日式既他他咪, 主人準備好哂床鋪喇~
有個衣櫃喎.....我地大家都話:" 會唔會叮噹就訓响入面呀!"
叮噹就冇喇, 不過主人好細心放咗三件日式睡袍比我地!
成間既佈置好日式, 好舒服, 大家都非常滿意! 正呀!!!
廁所同浴室係分開的, 毛巾, 洗頭水, 沖涼液...所有野齊全...
check out嗰日, 主人仲親手整咗早餐比我地, 好貼心呀 ^o^
走既時候送咗小禮物比我地, 連我身邊兩個大男人都話窩心到爆~~
真係要同主人講句 :" ありがとう"
嘩嘩嘩,呢間民宿好掂呀!
回覆刪除真係超掂呀...其實AIRBNB有好多好野嫁...
刪除