17/2早上九點零五分坐hk express既機飛到名古屋, 早咗十分鐘到逹, 拿拿聲去"NIPPON"到攞車, 嗰邊既人完全唔識英文, 真係雞同鴨講嫁....
車上既GPS鬼佬亦摸唔掂, 好彩朋友都識得用, 鬼佬主要靠手機既Google map去帶路。
不過始終第一次, 好 多時都行錯路, 而且今次得鬼佬識渣車, 八日既旅程佢渣咗1600公里, 即係等如香港渣去台灣, 再由台灣渣番香港仲要有多.....真係辛苦哂鬼佬了。
名古屋機場攞車後, 我地第一個落腳點係大阪, 就由名古屋渣車去大阪喇.....預計時間三小時。
日本地方大 (都係嗰句, 人地冇土地問題), 好多時渣渣吓車都會見到呢D "SA", 有食堂、便利店同廁所, 方便渣長途車既人休息吓。
由於兼航係冇早餐供應, 我地雖然預早兩小時去機場, 本來唸住check-in後可以食個早餐, 點知check-in條人龍多到呢....排完隊後先知入閘處要40分鐘先到逹, 所以都冇時間食早餐。
就係咁, 我地由朝早到到逹名古屋一直到下午三點都未有野落肚, 拿拿聲停响SA到食D野先!
唔知係咪肚餓既原因, 呢碗拉麵雖然係普通湯底, 唔係咩豬骨湯底, 都好好味呀~~
日本既咖啡好平, 7-11賣100日元, 即係港紙七蚊雞。仲要係咖啡機即沖出黎嫁~
食堂好大, 好多選擇, 我地食完野後又繼續渣車出發大阪喇~~
雖然早上九點起飛, 不過到逹大阪已經差不多晚上六點了.... 咁就冇咗一日喇...
09:05飛 > 13:10 (日本時間)到名古屋機場 > 攪呢攪路再拎車 14:00 > 中途停吓休息 > 約17:30到達大阪民宿
得番夜晚既時間, 我地緊係去最多人去既心齋橋行吓啦! 因為我一早plan咗呢晚掃哂D藥妝
由於响出發前已經search好哂要買既野, 所以有target咁shopping, 好快已經買哂我需要既護膚加化妝品。
章魚燒大部份都有人龍排隊, 我搵咗呢間試吓。900日元12粒 (成$56港元, 都幾貴嫁)
我去排隊, 兩條友就過隔雜夾公仔~~
冇我想像中好食, 因為佢太多汁, 浸到D章魚丸淋哂。不過入面係真材實料, 有大大粒既章魚, 而且唔會好似香港嗰D咁多粉。
若狹家(連結按此)
黎之前我有上綱睇過BLOG友們讚呢家既刺身飯, 其實我冇專登去搵佢, 不過行街經過見到, 唔試唔得囉~ 我最愛海膽呀!!!
你鐘意點配D刺身都得, 我地三個都叫咗海膽為主, 大約每碗一千日元, 真係好好味呀!!!
日本既激安店好多野都抵買, 我地就買咗呢枝威士忌番民宿嘆喇~ 計番百零蚊港紙, 平時免稅店賣都要二百幾呀!
呢晚行吓食吓, 番到民宿大約十一點幾, 大家傾吓飲吓, 點零兩點就訓覺喇!
沒有留言:
張貼留言