我地既民宿位於大阪府既八尾市, 周圍都係平民式住宅, 冇繁榮既購物街, 不過一般食飯, 澡堂, 便利店....都應有盡有。
出出入入多數係公公婆婆, 或者家庭主婦, 比較少見到D後生仔女。 但我反而喜歡呢種生活, 寧靜又舒適。
沿民宿行15分鐘會有澡堂, 日本人好鐘意去澡堂沖涼, 再浸埋湯。 我地本來都唸住去試吓, 不過由於我同鬼佬都有紋身, 就被拒了。
所以大家訂溫泉酒店時最好事先問吓, 因為日本基本上好多溫泉都唔比紋身者入; 不過依家都慢慢開放, 小型既紋身好多地方都會比入。
唔緊要....雖然冇得去澡堂, 但呢到都有食堂, 我地就响呢到食早餐啦!
呢到入去要除鞋, 日本真係一個好乾淨同人民好有收養既地方, 連食店既地下都一塵不染。
親子井 - 好滑既滑蛋, 再配埋喬麥麵, 呢個早餐太豐富了。
咖喱豬扒飯 - 佢個咖啡好啱我口味, 因為我唔食得辣, 佢呢個咖喱係甜嫁, 而且入面仲有肉碎, 超好味呀!
食完就出發心齋橋、道頓堀附近行街, 因為琴晚只係簡單咁行, 今日要黎個深層次探索。
呢個應該係蟹道樂, 我唸大家一定唔陌生, 不過我地冇入去食。 其實我去旅行唔鐘意睇旅遊書搵野食, 鐘意行到邊, 食到邊。
一來上得書既食店好多人, 二來呢D鋪頭明做旅客生意, 貴!
行到夜晚, 終於出發動漫街, 其實我地三個係名毒L, 不過平時响香港冇顯露出黎, 一去到日本就將D毒釋放喇....
夜晚就去咗呢間三豐麵到食晚餐, 都係求其搵間入去食, 之後上綱睇番先知原來咁多分店。
佢有兩層, 每層大約有十個位。 响門口部機買完飛後就入去比師傅, 入面既師傅唔識英文, 售麵機亦只得日文, 唔使怕, 看圖明白。
入面既食店亦只有日本人, 正! 我最怕去旅行聽到廣東話同國語!
佢個豬骨湯拉麵超濃味呀! 簡直連個湯都想飲埋呀!!
我叫嗰個餐係麵連飯, 肉碎飯加生蛋, 又係好食到停唔到口。
呢日我戰鬥力極高, 全日個口冇停過, 到最後仲要入去鋪頭入面食大阪燒......
嗯..... 大阪燒冇我想像中好味, 試過就算喇~~
第二日行程完結, 今晚早D番去執行李, 準備明天出發名古屋民宿~~~
沒有留言:
張貼留言