2016福岡自駕之旅 - DAY6 由布院貓貓Cafe

最後一晚我地係會响溫泉酒店過夜, 由於時間尚早, 而且我地隔離由布院都近, 就走去望望有乜野啦....

其實觀光同景點對我地三個人黎講都興趣不大, 不過福岡本身都係景點偏多既地方, 一場黎到, 就會去睇吓的!

好似呢個金麟湖, 其實都係遊客必到 (我只係遠遠映咗張相, 因為真係好拿多人响嗰到)

响由布院試咗呢間鰻魚飯, 唔記得個名喇, 總之都係好出名好多遊客去啦! 

不過老實講, 唔算非常出色。 因為我地去日本食野多數係亂咁搵, 加上駕車關係, 去食得既地方都係好當地, 呢D遊客區其實好少試。

 我地用咗好短時間遊哂由布院 , 又未夠鐘check-in溫泉酒店, 就去咗貓貓cafe hea時間~

 D貓貓勁可愛, 又嗲人, 有一隻仲嗲到會走上你個身到~ 連鬼佬唔太鐘意貓都會抱吓佢地、摸吓佢地....

呢隻貓同另一隻貓玩緊打交, 竟然走咗入去我到當山洞咁, 唸住突襲另一隻貓 

(我好似有條尾咁....)

呢個旅程我稱為動物之旅, 見到鹿、見到柴犬狗場、又有貓貓玩.....兩位男士可能冇乜特別感覺, 但我就好鐘意囉....