咳咳咳....唔停

好耐冇試過咳咁耐都唔停喇....

10日前臨出發去旅行前兩日已經FEEL到自己好似作病咁, 喉嚨痛痛地, 通常咁樣況下就好快變成咳, 已經拿拿聲出發前睇醫生開定藥, 去旅行途中真係有咳, 都食住D藥頂住先, 不過旅行點戒到口oY, 晚晚啤酒走唔甩, 一於番到香港再算。

番黎後第二日已經再去睇第二次補補飛, 食咗一日藥其實好得七七八八, 點知街坊撩飲酒, 好啦, 見都差不多好番, 飲啦~  結果第二朝咳到屎, 聲都沙埋。

再睇同一個醫生第三次, 食咗一日藥唔見好轉仲差咗

第二日轉第二個醫生睇, 今次係睇第四次了.......頂! 食咗一日藥仍然冇好轉, 又係咳唔到出黎, 篤啖頂住頂住响心口咁~  

我唔食藥喇!! 之前食一日藥基本上乜都好番哂, 我今次可能食太多藥, 身體反而唔慣。所以我就試吓唔食藥, 只煲野飲, 一陣出去跑個步, 可能仲快好番~

下次未好番哂都係唔好亂黎~~


更新: 今次係咁多年黎咳得最耐的一次, 最後我放棄治療, 唔再食藥, 燉咗川貝雪梨, 飲咗四晚後已經好轉了。之後就慢慢自然好番喇~

今次咳咗差不多大半個月, 記得下次西藥如果一次食唔好就唔好再勉強了, 食到個人對d藥都冇哂反應~