半年前响廉航訂咗去大阪既機票, 由於從來未試過一個人去旅行, 加上唸住撞吓三月尾有冇得睇櫻花, 就好型咁訂咗一張機票出發喇~
今次係窮遊日本, 所以機票住宿全部都好平:
機票︰ $639 (連稅) 我背包客, 行李都冇買
住宿︰$250 /晚 京都民宿兩晚
$200/晚 大阪青年旅館兩晚
______________________________________________
TOTAL $1539
首先要介紹吓今次京都所住既民宿。由於今次係一個人關係, 所以唔想book哂成間屋住, 就响bnb訂咗一間同日本媽媽一齊住既民宿。
呢間民宿位於京都某個鐡路站附近, 好近好方便, 周圍環境好寧靜, 唔會見到有遊客。
馬路上連車都唔多, 係一個普通住宅區
間屋大約六百幾呎, 有兩房兩廰, 全間屋就只有我同屋主兩個人住。屋主係一位日本媽媽, 囝囡都大哂, 分別搬離咗京都, 所以呢位媽媽就將自己屋變為民宿。
話就話民宿, 其實就係一個屋企咁囉。好有家的感覺~~
除咗媽媽自己間房, 全屋係任用的
呢間房係我訓的, 好舒適的他他咪。 房間大約100呎, 媽媽一早鋪好哂床鋪
第一晚媽媽請我飲梅酒。夜晚我同佢都會坐响飯廰傾吓偈, 雖然大家雞同鴨講, 但最終都會表達到~
媽媽會煮一日早餐比我食, 只係需要500日元(港紙約$35), 但就係一個勁豐富的日式早餐.....早餐都開個邊爐出黎滾豆腐, 好正呀!
全部細細碟但食落真係好飽嫁
仲有手沖咖啡, 連個杯都咁靚, 真係好配服日本人既細心及美感~
呢兩晚同日本媽媽一齊住, 係一次好特別既旅行體驗。日本媽媽真係好似我地平時睇戲嗰D咁, 咁溫柔、咁識照顧人嫁。
對於一個女仔到日本, 我好推薦跟日本當地家庭同住, 當然訂民宿時要留意過去留言。
其實唔需要擔心溝通唔到, 响我唔識日文, 而媽媽又唔識英文下, 大家都係明白對方想表達乜野, 所以言語並不是問題~~~
沒有留言:
張貼留言