川芎白芷天麻燉魚頭湯

上個月鬼佬頭痛得好勁, 係連續頭痛冇停咁, 持續咗一星期, 食完止痛藥止咗兩三個鐘, 藥力一過咗又痛過。

因為鬼佬從未都好少會頭痛, 突然間咁樣我地都好擔心。 所以即刻去咗私家醫院到睇, 住咗一晚醫院, 照咗MRI, 唔係D大獲野 (最擔心係腦有D乜野野)。 檢查咗一大輪, 洗咗兩萬蚊, 醫生都唔可以講到一個確切既答案.....

因為頭痛原因實在太多, 有可能腦血管發炎、有可能偏頭痛、頸椎移位壓住神經線、高血壓引致頭痛, 亦有可能係因為痛症持續所以引發高血壓......

總之就解釋唔到啦! 

結果鬼佬到今日都係斷斷續續咁頭痛, 入咗私家醫院後, 之後有一次入過政府醫院, 住咗一晚.....又係廢既!!!!

開咗一大堆藥: 有降血壓藥 - 食咗兩星期血壓一D都冇降低到! 反而鬼佬做完運動仲即刻降番, 其實鬼佬不嬲冇高血壓嫁, 而且keep住有做運動, 都唔知點解今之頭痛後就一直有了

依家唯有頭痛就食止痛藥啦! 我都幫唔到佢D乜~~ 煲咗呢個魚頭湯比佢, 連飲幾日都冇乜用

唉.....我笑鬼佬已經係呀伯喇! 四十幾歲就咁殘~~ 

其實個湯幾好飲嫁, 我都有飲到, 我幾鐘意嗰陣藥材味~~

材料:
大魚頭1個 (約$45)
川芎、白芷、天麻、南棗 (叫藥材鋪買你分番每次既份量)

1. 魚頭洗乾淨抺乾水
2. 燒熱鑊爆薑片, 落魚頭煎至兩邊燶
3. 倒入一大碗水落魚頭到, 等D湯變奶白色後倒入燉盅內
4. 連埋藥材燉兩小時就飲得 (自己調味)