鎮江骨

我覺得我今次個骨好成功呀. D汁啱哂鬼佬既口味, 又啱啱掛到上D骨到, 份量又啱啱好, 每人食五條~  鬼佬好唔鐘意酸, 所以呢個骨係偏甜, 亦不失酸味, 好味!

我因為怕會整得唔好食, 所以專登買急凍骨黎整, 因為新鮮骨貴嘛, 呢到十條骨都唔使廿蚊. 唔想side野. 不過今次整完後好滿意, 我又記得個份量, 所以下次一定會買新鮮骨呀.

材料: 金沙骨(一字骨)10條

醃料: 生抽1湯匙, 砂糖1茶匙, 麻油少許, 鹽少許

調味: 玫瑰露1湯匙, 鎮江醋3湯匙, 生抽3湯匙, 片糖1 1/3片

1. 熱鑊先炒香骨, 再落調味炒兩炒, 加水蓋過骨2/3
2. 大火滾起轉中小火炆 (期間要不停反吓D骨)
3. 炆至差不多收汁(要留番D汁呀, 仲要係水狀), 熄火焗半小時, 再開火炆至汁收就得喇

其實鎮江骨冇一個固定食譜, 我上綱睇好多人整法都唔同, 份量亦好參差. 不過我覺得最緊要係整啱自己食就OK喇~

而且又炆又焗呢種方法, 係需要多D時間, 所以如果平時放工我就唔會炆野喇~ 因為炆親野我一定會用焗呢種方法, 咁D肉先會真正入味, 而且會淋D.