麒麟豆腐

依家逢星期三晚七點鐘有個節目叫"癌變解碼", 聽個名都知講乜啦. 每次睇親呢D我都會個心唔多舒服, 特別今集講緊嗰個胃癌病人(真人出鏡), 雖然睇佢表面好似仲好健康咁, 但醫生响最後話呢位病人其實存活期有兩年已經係好好. 唉....聽到真係唔多舒服.

因為每次都會令我唸起老豆, 記得當時由發現到離開, 都只係半年時間多D. 癌症真係一個好恐佈既病, 真係希望醫學上有更多新突破, 可能多年後, 呢個病係有得醫啦~

因為對病人同佢既家人黎講, 呢段時間真係折磨. 就好似死神同你講:"你就快死喇" 面對死亡, 係好多人都無法面對既事......唉...好喇, 唔好再講唔開心既野喇, 講番今日個開心餸先.

呢個餸係跟李錦聯學嫁, 想整好耐嫁喇, 基本上跟足佢, 係將D磨菇變咗火腿.  豆腐同魚柳呢D淡味餸配上芝士咁濃味既汁, 真係幾特別, 不過間中食吓好喇, 因為每食一啖就覺得好肥, 啖啖芝士啊! 太唔健康了!

材料: 調味: 做法:

蒸煮滑豆腐1盒、龍脷魚柳1塊、火腿幾片、芝士片2片、乾蔥蓉1湯匙（煎香）、魚露2茶匙、淡奶2湯匙、蔥花2湯匙、雞湯1又 1/4量杯

醃料： 鹽1/8茶匙、胡椒粉少許、生粉1茶匙、麻油少許

1.將豆腐取出，吸去多餘水份，切成厚件備用。 2.將火腿切片。 3.將龍脷柳切成魚塊，抹乾後與醃料拌勻醃5分鐘備用。 4.在豆腐件之間釀入魚柳及火腿，排在碟上蒸約6分鐘至熟透。 5.將雞湯煮滾，加入芝士片、乾蔥蓉、淡奶、魚露，慢火煮約2分鐘，以生粉水埋芡，淋在豆腐上，撒上蔥花即成。