麻辣雞煲

由2011年開始興雞煲已經開始講, 講咗兩年, 冬天都過埋喇, 都未整過一次雞煲, 真係對自己唔住. 今日鬼佬講開話好掛住土瓜環某間雞煲, 我就話不如今晚我自己整比你食啦. 佢即刻舉哂腳咁~

上綱睇過好多食譜, 好似唔係好難, 只係香料比較多, 我一一買齊~

材料: 冰鮮雞一隻(  雞patpat切走, 留番patpat附近舊雞皮留用), 雞湯, 豆辦醬
配料A: 蒜頭7粒, 蔥頭3粒, 薑幾片, 花椒10粒, 八角幾粒, 洋蔥1/4個, 指天椒1隻
配料B: 芹菜, 洋蔥3/4個


1. 雞先用蠔油4湯匙, 生抽4湯匙, 老抽2湯匙, 糖2湯匙, 麻油1湯匙, 玫瑰露1湯匙 醃幾小時
2. 燒熱鑊 (一定要好熱,先能炒出香味), 用patpat塊雞不停搽鑊, 會出好多油嫁
3. 落配料A爆香, 再落雞件及豆辦醬炒香, 加入雞湯, 蓋上鑊蓋3分鐘
4. 試味及加入配料B (我仲加入枝竹), 再煮多2分鐘, 起鑊, 加入芫茜上面

雞煲配啤酒 = 一流~ 人間享受是也~~~


下次我再煮會將雞醃一晚, 因為今次煮完後, 我覺得個汁啱口味, 但D雞唔多入味,所以我相信醃過夜會更好。 我唔食得辣, 所你大家見我辣料方面係用好少, 不過咁大煲野, 下次我都會再落多少少辣料, 好似會過隱D. 而且下次芹菜洋蔥會再落多D, 因為煮完後呢D入哂味, 好正呀~


呢個雞煲, 加加埋埋都落咗超過10湯匙既調味料, 醃既時候已經唸:" 嘩,,,咁多...好重口味喎~ "  但其實煮完出黎, 同出面嗰D雞煲比, 都仲係差DD. 如果呢個雞煲同出面比, 食慣街既人會覺得呢個唔夠味. 但其實佢都唔少調味料喇, 可想而知出面d野係幾重味精oY~ 等你D人仲食到D人lam lam脷!

呢個雞煲, 自家煮都嫌重口味呀, 都係間中一次好喇~ 出面既, 少食為妙!