鎮江肴肉

出去食上海菜, 我一定會叫鎮江希肉黎食 , 一直想自己試吓, 上綱搵過唔係好多食譜. 只有幾篇; 去大陸綱搵吓, 唸住整正宗的肴肉, 點知鬼屎咁煩 , 又要買一種叫"硝"既物體黎醃肉三日, 大陸就有啫, 香港都未聽過, 連呢個字係簡體定繁體我都未知呀~~



响華潤買咗隻有骨豬手, $35, 仲可以用黎煲湯先整, 一d都唔浪費~

食後感: 嗯~~ 唔係出面食到嗰種味囉~ 我認為用雞湯黎整個雞湯凍, 對我黎講咸得滯, 下次我會將雞湯溝一半水黎做~  而且魚膠片既份量唔太啱, 所以令到雞湯凍唔夠硬, 下次應該加多d魚膠片既份量.



而且, 又買咗枝難食既醋.....唉...又比人啱! 去到雜貨鋪, 我問佢有冇紅梅牌定金梅牌既醋 (靚婆婆介紹過, 不過行過幾個地方都搵唔到), 佢求其拎咗枝比我話都係上海醋黎嫁, 我見八蚊雞, 又試吓啦~ 嘩...媽的! 又係酸到呢~~一倒出黎陣味已經頂唔順喇 ~   我幾時先買咗啱既醋呀??



材料: 急凍有骨豬手一隻, 雞湯500g, 花椒, 八角, 紹酒, 薑, 魚膠片10片

1. 豬手先解凍, 煲一煲薑蔥水, 放入豬手約10分鐘, 撈出洗乾淨以去肥肉
2. 豬手先用來煲湯一小時, 撈出起肉後, 放回豬骨繼續煲湯
3. 再煲滾一煲水, 落花椒, 八角, 紹酒, 加入豬手煮10-15分鐘
4. 撈出後浸入冰水, 待凍後切粒, 倒入四方形食物盒
5. 煮熱雞湯500g, 加入魚膠片10片, 攪至溶
6. 將雞湯倒入食物盒內, 放雪櫃下層雪至硬身即可切件上碟