自家韓式BBQ

家陣D人乜都話韓式, 唔知幾時開始D人老土當時興 (老實講, 我就唔覺得韓國野好潮囉) 

不過見到依家出面D韓國BBQ鬼咁多, 仲要吓吓食餐都要三百幾蚊一個人, 覺得唔係咁抵囉。唔抵得, 又自己攪餐玩吓~

 

我呢個韓式BBQ除咗冇Oppa幫你燒之外, 我覺得同出面嗰D冇乜分別。

韓Q主要係食豬同牛, 今次都唔例外: 牛有四款, 豬有兩款, 另外仲有鮑魚, 魚類.....
 

食肉既時候包埋生蒜、大蔥

醬料方面我亦準備四種:  中式辣醬、韓國沾醬、BB麻醬、泰式雞醬

呢盒韓式沾醬我响一田買$39,  點知轉個頭响759見到賣$19  !!!

 呢個時候我地睇睇出面某韓式BBQ既餐牌:牛肉拼盤賣＄３３８

大約有唔夠８塊牛舌、８塊雪花牛、４塊牛仔骨、仲有樣應該係牛小扒

豬肉拼盤賣＄２９８

大約係幾舊所謂韓式五花腩、韓式豬頸肉，　仲有唔知韓式乜啦。。。。

淨係叫兩個拼盤都六舊水喇!!!

呢個係我自家既牛肉拼盤，　係响買番黎既牛入面抽咗一少部份黎擺拼盤, 如果要將我所有牛都跟出面既份量擺拼盤, 我估應該擺到最少四份。即係出面的話, 呢到淨係牛已經收你千田蚊@@

以下係我既拼盤: 
牛肩脊 - 新鮮手切, 雪花分明
牛舌     - 購自牛肉檔, 冰鮮
牛仔骨 - 購自凍肉檔, 急凍的。番黎用汽水浸咗半日, 因為汽水入面既梳打成分可以令佢D肉軟化, 燒完就唔會"un"
澳洲和牛牛板腱 - 購自一田, 只要燒燶表面少少就得, 食時入面仲有血的, 正呀!


再睇睇我呢餐韓式BBQ用咗幾多錢~

四個人食到食唔哂, 啤酒飲到嘔, 每人都唔過二百大元。

我同鬼佬又係嗰句, 以後唔會出街食!!!!