親子井

親子井其實即係滑蛋雞扒飯。之前一路都冇唸住整呢個飯, 有一日鬼佬响Youtube睇咗條片係教人煮呢個飯, 就話要食。

上綱搵完食譜都唔算難喎, 又學吓先~

原來好容易, 又勁好味。 特別係D洋蔥, 吸哂D湯超好味呀!!! 我仲要响飯面加入七味粉, 好好味呀!!!!

上綱好多食譜都話雞係唔使醃的, 不過因為我D雞扒係購自佳寶, 所以我都係預早一晚用 (魚露1.5湯匙, 糖1湯匙, 少少麻油/胡椒粉) 醃咗佢

我只係响12蚊店買咗一枝味醂, 食譜話要用鰹魚高湯, 當日我搵極都冇, 所以用咗普通雞湯代替。 我都覺得好好味喎。

人家話用日本豉油, 我又唔知邊種, 所以用咗屋企既壽司豉油。我又係覺得OK喎。

學肥媽咁, 屋企有乜咪用乜囉!

點知第二日行吉記時又比我見到呢種鰹魚粉, 開水就可以變高湯。見咁平15蚊就買包試吓, 下次整完同大家講佢同雞湯既分別。

材料 (2人)

雞扒1塊   
雞蛋3隻    
洋蔥1個
雞湯1杯
豉油3湯匙
味醂2湯匙

1, 將雞湯, 豉油, 味醂煮滾, 加入洋蔥轉小火煮2-3分鐘
2. 開大火加入雞扒粒, 滾後轉小火加蓋煮3分鐘
3. 開蓋開入一半滑蛋, 加蓋焗一分鐘
4. 最後再加入一半滑蛋及蔥粒, 熄火, 蓋20秒左右

完成後成塊鋪上白飯.....oishii