本來呢日行程係plan咗去三瀬牧場睇吓小動物、渣吓牛奶、映吓靚相咁, 點知兩條友仔....一個就琴晚飲大咗今朝頭勁痛, 一個就琴日著唔夠衫凍親今日作病。
你兩個麻甩佬!仲潺過我呢個女人~~ 結果訓到下午一點先起身, 食埋野去到牧場已經四點半, 職員話已經停止售票了。
渣牛奶就冇喇, 買咗枝當地既鮮奶飲完當渣咗啦!!
駕車去牧場途中, 求其搵個地吓醫吓肚啦, 响日本真係好難有野唔好食, 求其搵都咁好食。
喬麥麵彈牙, 個汁又正, 天婦羅係新鮮炸
個定食一擺出黎已經夠哂吸精, 每款都細細碟但其實食哂係好飽
價錢亦唔貴, 一個勁豐富既定食, 為起港紙$70左右, 响香港邊有可能食到!
餐牌上冇話過定食係有野飲嫁。當我地食完時, 店員奉上香噴噴既咖啡, 仲放得好鬼靚啫。令我地覺得一切都好貼心呀!
而且店員好好笑容, 用有限既英文同我地溝涌, 亦盡量介紹, 成餐飯都令我地有好窩心既感覺呀!
離開牧場, 我地有一個好重要既任務, 已經唔能夠叫行程, 係任務!! 就係去ONE PIECE福岡店朝聖聖聖聖聖聖...........
介紹一下先︰呢一間MUGIWARA STORE全日本只有四間 (東京、大阪、名古屋、福岡) , 係官方的, 有最新最獨家既產品, 每一間都有一個1比1 既角色响到。
我已經去咗名古屋, 今次黎咗福岡, 黎緊三月會去大阪, 仲差東京。 我成日同人講, 去埋東京我就行咗偉大航道一個圈喇...... (當然有睇ONE PIECE先明我講乜啦)
身為毒L, 黎到呢到一定打咭、瘋狂拍照、瘋狂購物啦~~唔講住喇, 我去shopping喇~~~
shopping完就响福岡市中心入面又係求其搵間野食。 好有日式風味既串燒店, 圍住個師傅坐, 想食乜就叫佢燒。
當晚有個日本型男食客(相左邊), 攪到朋友都忍唔住要扮映食店咁映吓佢^o^ 不過佢真係幾型嫁, 連我身邊兩位男士都覺得佢有型。
呢晚番到去, 朋友唔敢飲酒了, 話因為琴晚太醉, 今日怕怕。所以佢今晚冇醉喇(唯一), 大家番到去執吓行李準備明天出發堅離地民宿。
沒有留言:
張貼留言