依家每次去旅行都會透過AIRBNB去訂民宿, 特別係自駕遊。我好鐘意享受寧靜的環境, 所以好鐘意駕車去到一D深山入面住民宿。
今次間民宿, 由福岡駕車去要兩個幾鐘, 途中既山路......令我親身體驗咩叫髮夾彎 。(如果你有睇頭文字D, 你就會明我講乜)
民宿主人應該好喜歡貓頭鷹, 入面好多擺設都係貓頭鷹, 好可愛。
一入門口就係樓梯上上層, 左手邊就係入大廰, 先帶大家上樓上睇睇
樓上主要係訓覺既地方, 我地三個人鋪咗TATAMI仍然有好多空間, 基本上呢到訓10個人都冇問題。
呢到就係樓下既大廰, 呢幾日我地都响呢到飲酒, 打邊爐.....長長既餐枱真係放乜都得
大廰隔離其實仲有一間睡房, 不過黎到日本當然係訓TATAMI啦, 所以呢間房咁多日都只係用黎放我件外套。
哈! 响香港寸金呎土既地方, 如果有一間房用黎放一件外套係幾咁奢侈既事~
呢到仲有大大個廚房, 所有廚具乜都有, 我地有一晚就响到Shabu Shabu喇!
自駕遊真係好方便, 我地去日本既AEON或其他Supermarket買齊料, 加上日本既邊爐湯包, 三條友晚晚飲飽食醉, 真係爽YY~~~
民宿主人睇得出係一個識得享受生活既人, 佢買既杯杯碟碟全部都好靚, 而且竟然仲有生啤機!!! 可惜我地唔識整啦~
大廰出面既露台, 竟然有蒸氣爐!!! 問你死未!!!
我地每一日都食溫泉蛋, 四分鐘就有流心溫泉蛋食。而且仲用佢蒸茄子、蕃薯....好天然好鬼正呀!!
仲有燒烤爐添呀! 不過因為天氣太凍, 得1度, 一响室外留多幾分鐘都頂唔順, 所以我地都冇燒到
重點黎喇......更衣室後面.......
呢到係室內溫泉!!!
大家記得要自律, 去到日本浸溫泉一定要先沖乾淨自己先好落水呀!
呢個民宿竟然响自己露台有一個私人露天溫泉.....OMG!!!!!
我每一日都浸三次, 起身一次, 回家一次, 食飯後一次......浸到縐皮都要浸呀!!!! 哈哈.....
浸响到, 望住一望無際既山景, 可惜天氣不似預期, 唸住12月會落雪, 可惜冇。如果唔係相信更完美。
呢間民宿冇得輸! 我比滿分, 我一定會再黎!!
响香港, 如果你唔係超級有錢, 根本唔會住到咁大既屋。但如果你有用開BNB, 你就會知道, 其他地方真係冇土地問題, 好似日本咁, 好多民宿主人都係多出一間屋用黎租比人。
去完日本, 住過當地人既民宿, 番到香港真係有一種好討厭既感覺! 點解一個咁討厭既地方仲要有咁多人死迫落黎? 點解幾百萬只能買一個蝸居?
來生不做香港人? 我可以永生都不做香港人嘛?!
沒有留言:
張貼留言