由於坐中午12點幾機到關西機場, 所以當日去到京都已經係晚上時間, 所以都冇plan到任何野, 就响民宿附近搵野食。
附近有間好似快餐店的食店, 比佢門口呢張海報吸引住, 就入去叫咗呢個飯。
一入去就响自動售賣機買飛, 之後再比店員, 然後自己搵個位坐, 飯整好後店員會送到你枱面。
我叫咗呢個細牛肉飯 - 490日元 (約$35港紙), 好好味呀~
牛肉有D似生牛肉咁, 個汁好match, D飯又好好味, 總之成個飯冇得輸! 不過份量係少的, 我一個女士食完後都唔覺飽, 所以就繼續搵食.......
其實剛才食牛肉飯係專登叫最細份, 因為想試埋其他野.....
行多條街, 比我見到間好隱閉o既食店, 好似日戲"深夜食堂"嗰D咁, 就膽粗粗咁行入去, 入到去果然係"深夜食堂"嗰種style, 師傅响中間煮食, 食客圍住佢坐, 座位大約十幾個。正~~
入到去只有兩位客人, 一路食都一路同師傅有傾有講。可惜我唔識日文, 如果唔係我都會一齊傾。
我只識用日文叫啤酒, 所以一坐低就好型咁叫"ビール"
跟住望吓餐牌.......
由於呢D地方唔會有遊客到訪, 所以並唔會有中英文餐牌....仲好!!! 我一於求其篤.....
除咗啤酒, 當晚我就點咗兩款食物.....
其中一個係呢個, 我因為見到漢字有個"卷"字, 所以叫佢。原來係鐡火卷, 不過我並唔知有10件咁多!!!
另一款因為有漢字"國產"二字, 原來係煮牛根。
兩款都好食, 不過份量對於我一個人黎講有D多 (因為之前食咗一個牛肉飯), 不過我都全部食哂。
對於日本人師傅黎講, 响佢面前食剩佢所整o既食物係好唔專重, 況且呢兩款食物都相當好味呢~~
食完後我响附近便利店逛吓....嘩!!! 人地日本雞蛋好平呀, 100日元(約$7)有六粒。鬼佬係蛋怪, 如果比佢見到我估佢會不顧一切咁瘋狂購入....
呢個柑成200日元(約$14)一個, 其實有D貴嫁, 不過我就係想試吓呀!!!
果然好甜!!! 同平時香港買嗰D 10蚊三個真係唔同嫁.....
第一日坐完飛機坐完火車, 好簡單咁响附近行吓食完, 番到民宿10點零鐘, 今晚好快就訓著了....
nerpoyr
回覆刪除